دمياط - هيثم مراد

الشهامة عنوان المصريين، عبارة رددها أفراد أسرة الأسطى عماد جلال صاحب الـ44 عاما ابن محافظة دمياط، والذي تدخل لإنقاذ سيارة نقل كادت أن تسقط بطريق دمياط - المحلة.

لقطة بطولية قدمها سائق دمياطى، لم يكن يعلم أن أحدهم بدأ تصويره، كان فقط يفكر فى إنقاذ زميل له ومنع كارثة مرورية بالطريق، رغم أنها لا تتجاوز ثوان معدودة عبر مقطع الفيديو إلا أنها تمكنت من حصد إعجاب الجميع، ويقدم اليوم السابع من داخل منزل الأسطى عماد لقاء خاصا حول تلك الواقعة.

«معملتش حاجة تستحق التكريم، إنقاذ زميلي ومنع كارثة زى دى هو التكريم الحقيقي ليا» بهذه العبارة بدأ الأسطى عماد جلال حديثه لليوم السابع ليستكمل الحديث قائلا: «أى حد مكانى كان هيعمل كده، السبيل الوحيد لإنقاذ الموقف أن عربية تدخل تسنده مفيش حل تانى، بدون تفكير عملت كده». وتابع: «الجدعنة والشهامة مش جديدة علينا في مصر، هنفضل بلد الجدعنة في العالم كله، وفرحتنا بإنى أنقذت زميلي كانت متتوصفش».

وأضاف صاحب واقعة فيديو إنقاذ التريلا قائلا: في لمح البصر كنت بجوار السيارة، وقولت لزميلي اطمن اسند عليا وامشى براحتك. وأوضح: للسواقين إشارات على الطريق بنفهم بعض من خلالها، بلغته إنى هسحبه لحد ما يتمكن من العربية، فضلنا ماشيين 30 دقيقة تقريبا لحد ما قدرت أوصل بيه لمنطقة أمان.

واستكمل الحديث قائلا: كل اللى كانوا على الطريق احتفلوا بيا، عملوا حفلة كلاكسات عشان اللي حصل، حسيت إننا في زفة أو رايحين فرح بصراحة فرحت جدا وقتها، وأوضح: تركت زميلي بعد ما اطمنت عليه ومشيت مكنتش أعرف إن حد صورني، ومفكرتش في حاجة بعدها. واختتم حديثه قائلا: مفيش حاحة تستحق التكريم لأن اللي عملته ده واجب، وعايز أقول لزميلى ده ربنا يحميك وخد بالك بعد كده من الحمولة.