مصر بتتطور بسرعة الصاروخ، وده عشان ننفذ خطتنا لتوطين صناعة القطارات والمترو، بس يا ترى مصر هتقدر فعلا تبقى مركز إقليمي لصناعة القطارات في الشرق الأوسط؟، وهل هنشوف أول قطار مصري الصنع بالكامل قريب؟، وهل الصناعة دي هتخلق فرص شغل قد إيه للشباب المصري؟، وهل الخطط دي معناها إننا خلاص ودعنا عصر الاستيراد؟ مصر داخلة مرحلة جديدة تمامًا في عالم الصناعة، وبالذات في مجال النقل والسكك الحديدية، يعني بدل ما كنا بنستورد القطارات والمترو وكل مكون صغير من بره، الدولة قررت خلاص تعتمد على نفسها وتبدأ تصنع كل ده هنا في أرضها. وزارة النقل بقالها فترة شغالة على خطة كبيرة لتوطين صناعة القطارات والمترو من الألف للياء، وده من خلال جذب استثمارات ضخمة من شركات عالمية، عشان ننقل التكنولوجيا الحديثة وندرب العمالة المصرية ونوفر العملة الصعبة بدل ما نفضل نصرفها على الاستيراد. الفكرة ببساطة إن مصر تبقى مركز إقليمي لصناعة النقل، مش بس لنفسها، لكن كمان نصدر لإفريقيا والدول العربية، وفعلا الدولة بدأت تنفيذ 10 مشروعات استراتيجية ضخمة في المجال ده. أولهم مشروع ألستوم الفرنسية، اللي شغالة على مجمع صناعي عملاق في برج العرب على مساحة 40 فدان، لإنتاج الوحدات المتحركة ومعدات البنية التحتية.. وكمان شركة كول واي الإسبانية خلصت مصنعها في كوم أبو راضي، وبدأت إنتاج تجريبي لمكونات القطارات. غير كده، هيونداي روتيم الكورية بتنفذ مشروع كبير في شرق بورسعيد بالتعاون مع شركة نيرك المصرية، لتصنيع 40 قطار مترو يخدموا خطوط القاهرة الكبرى… وفي نفس الوقت، فيه مصنع جديد بيتجهز لإنتاج عربات السكك الحديدية بنسبة توطين توصل لـ80%، وكل ده بالجنيه المصري، دعمًا للصناعة الوطنية. ومن المشاريع اللي بتدعم البنية التحتية نفسها، فيه شغل مع شركة فوست ألبين النمساوية لتطوير ورش العباسية وإنتاج مفاتيح السكك الحديدية.. وبرضه السويس للصلب داخلة بمصنع لتصنيع القضبان بقدرة إنتاجية ممكن توصل لمليون طن في السنة، وكمان حديد عز بدأت إنتاج ألواح الصلب اللي بتستخدم في أبدان العربات والسفن. أما عن الفلنكات الخرسانية، فـ6 مصانع مصرية شغالة عليهم دلوقتي، منهم 4 مخصوص لشبكة القطار السريع.. وكمان في تعاون بين شركات وطنية زي النصر، الجيوشي، والسوبرجيت لتوريد وتصنيع الأتوبيسات.. ده غير مصنع السويدي وأباظة للمقطورات اللي هيصنع الشاحنات والعربات القلابة لخدمة البنية التحتية. كل ده جزء من رؤية الدولة إنها تخلي مصر تعتمد على نفسها، وتبقى قلعة صناعية حقيقية في مجال النقل، تخلق فرص عمل، وتنقل الخبرة للأجيال الجاية، وتخلي العالم كله يشوف أن الصناعة المصرية رجعت وبقوة. المصدر: بانكير
