كتب المخرج والمؤلف محمد دياب توضيحاً بشأن الجدل المثار حول العرض المحدود لفيلمه هابي بيرث داى بعد اختياره لتمثيل مصر في سباق جائزة الأوسكار لأفضل فيلم أجنبي، حيث بدأ منشوره على "فيس بوك" بمقولة "العرض المحدود، سيئ السمعة!". تعليق محمد دياب على فيلم هابي بيرث داى وقال محمد دياب: "شهر سبتمبر من كل عام هو توقيت اختيار دول العالم للأفلام اللي هتمثلها في مسابقه الأوسكار، وبصفتي عضو في أكاديمية الأوسكار الأمريكية منذ 8 سنوات فعندي بعض الخبرة في الموضوع ده". وتابع دياب: "أولاً لجنة اختيار الفيلم المشارك في الأوسكار بتتكون بعد ترشيح نقابة السينمائيين لأسماء بارزة سينمائياً وسنوياً بترد أكاديمية الأوسكار الأمريكية باختيارات من الأسماء دي، والأفلام اللي مسموح لها تشارك هي الأفلام اللي اتعرضت تجارياً في السنة اللي سبقت نهاية شهر سبتمبر لكل سنة، وعلى مدار السنة الأفلام اللي لمعت في مهرجانات مهمة وخدت جوايز بتاخد دفعة وزخم بتاع نجاحها القريب وبتحاول إنها تبقى اختيار بلدها للأوسكار". واستكمل: "كتير من الأفلام دي بتكون لسه متعرضتش بشكل تجاري في بلادها، وبيبقى فى اختيار من اتنين تأجيل ترشيح الفيلم للسنة اللي بعدها وخسارة الزخم اللي عمله نجاحها أو أنها تعمل عرض محدود لاستيفاء شروط الترشح، وطبعاً الفيلم اللي بيختار يترشح السنة اللى بعدها بيبقى اتنسى تماماً عند المصوتين وفرصته تقريباً بتتلاشي". وكشف عن شروق العرض قائلاً: "إيه هي شروط العرض اللي الأوسكار حاطاها؟ إن الفيلم يتعرض لمدة أسبوع تجارياً على الأقل في سينما واحدة، مثال الفيلم البرازيلي I am still here الحائز على أوسكار أحسن فيلم العام الماضي، تم عرضه عرض محدود في سبتمبر في البرازيل ثم تم عرضه عرض عام في فبراير". وأضاف: "القصة دي بتتكرر كل سنة بالذات للأفلام اللي بتروح مهرجان فينيسيا اللي هو في سبتمبر، وده بيخلي العرض التجاري فى أحوال كتير مستحيل، والسنة دي على الأقل في سبع أفلام من فينيسيا تم إعلان اختيارها لتمثيل بلادها في الأوسكار وغالبيتهم اختاروا أنهم يعملوا عرض محدود، يتبعه العرض العام لاحقاً. وتابع: "الوضع ده نفسه حصل مع فيلم (عيد ميلاد سعيد) السنة دي وفيلم (الشيخ جاكسون) اللي كان اختيار مصر للأوسكار سنه 2017، واللى تم عرضه عرض محدود في سبتمبر تبعه عرض عام لاحقاً، وساعتها حصل لغط زي اللي حصل السنة دي". وأوضح: "العرض المحدود دائماً بيبقي دعايته بسيطة وهدفه استيفاء الشروط عشان ميأثرش بالسلب على عرضه التجاري اللاحق لو الجمهور لو أعتقد إن الفيلم نزل واتشال قبل كدة، المعلومات دي ممكن تكون مش متاحة للجميع فده بيسبب صورة سلبية سيئة السمعة عن العروض المحدودة وبيخلى ناس تفتكر إنها تلاعب، المدهش إن مصر هي البلد الوحيدة في العالم اللي عندها عدائية تجاه العرض المحدود، مع إن لجنة الأوسكار الأمريكية بتتعمد التسهيل، فمثلاً فيه قرار جديد إن العرض المحدود حتى مش لازم يبقى فى البلد الأم". واستكمل: "أهمية إننا نشيل الوصم اللي على العرض المحدود، إن متضعش فرص على أفلام مستقبلية، لأن تهمة التلاعب غير الحقيقية قانونياً وأخلاقياً، بتضغط على لجان الاختيار إنها تتفادي اختيار الأفلام دي عشان هي نفسها ميطولهاش اتهامات، وبفكر الكل بالنقطة الأهم وهي إجماع لجنة الاختيار المحترمة على إن فيلم (عيد ميلاد سعيد) هو اختيار مصر للأوسكار بناء على تميزه الفني. الفيلم فيلم افتتاح مهرجان الجونة وحصل على 3 جوائز في مهرجان ترايبكا، أحسن فيلم، ومخرج وسيناريو، الفيلم أيضاً شارك في إنتاجه الممثل الحاصل على الأوسكار جيمي فوكس في سابقه محصلتش لفيلم مصري". واختتم حديثه: "أخيراً أشكر نقابة المهن السينمائية ولجنة الاختيار المكونة من فنانين ونقاد وسينمائين اللي اختاروا الفيلم اللي حبوه رغم معرفتهم باللغط اللي ممكن يحصل، وأكيد محتاجين الدعم من كل المصريين كما تدعم كل الدول اختيار لجانها". وانتهى العرض المحدود للفيلم المصري هابي بيرث داي في إحدى قاعات السينما بالتجمع الخامس بعد عرضه فيها لمدة أسبوع في 42 حفلة بواقع سنة حفلات يوميا حفلت كلها بالاقبال الجماهيري. وكان الفيلم الذي تم اختياره بأغلبية كبيرة لتمثيل مصر في مسابقة الاوسكار كأفضل فيلم اجنبي قد بدأ عرضه المحدود في إحدى القاعات بالتجمع الخامس يوم الاربعاء الماضي تنفيذا لشروط الترشح الرسمية للاوسكار. والعروض المحدودة هو إجراء متبع لاستيفاء الشروط بين الأفلام المرشحة للاوسكار مثل الفيلم البرازيلي أنا مازلت هنا الفائز بجائزة الأوسكار افضل فيلم اجنبي للعام الماضي حيث عرض عرضا محدودا في سبتمبر وبعدها عرض عام في فبراير بالبرازيل. وكان الفيلم الذي أخرجته سارة جوهر قد حقق إنجازا عالميا للسينما المصرية والعربية بعد فوزه بثلاثة جوائز من مهرجان ترايبيكا ليصبح أول فيلم مصري وعربي يحقق هذا الإنجاز العالمي للسينما المصرية. فيلم هابي بيرث داى من بطولة نيللي كريم، حنان مطاوع، شريف سلامة، حنان يوسف، تايسون، على صبحي، حازم إيهاب، جهاد حسام الدين، خديجة أحمد، فارس عمر، وضحي رمضان، ومن تأليف محمد دياب وسارة جوهر، وإخراج سارة جوهر.
