بهاء نبيل - شيماء منصورالأحد، 05 أكتوبر 2025 05:00 م تحدث سامح سليم مدير التصوير خلال ندوته المقامة ضمن فعاليات مهرجان الإسكندرية السينمائي لدول البحر المتوسط، بدورته الـ 41، عن عدم خوض تجربة الاخراج مثل بعض مديرين التصوير قائلا: "مفكرتش في الإخراج، لانه بيحتاج تركيز من نوع تاني، وانا شايف ان مدير التصوير ان اصبح مخرج سيركز في التصوير بيركز في التصوير وهو بيخرج هيفكر في حاجات في التصوير وسايب حاجات المفروض هي اهم في التفكير بالنسببة للاخراج نفسه". وأكد مدير التصوير سامح سليم أن العمل الفني هو في الأساس منظومة جماعية، قائلاً: "العمل الفني عمره ما بيكون مجهود فردي، هو شغل جماعي، ولازم يبقى في كيميا بين مدير التصوير والمخرج، أو على الأقل ذوق قريب من بعض علشان أقدر أحقق رؤية المخرج لازم نكون فاهمين بعض كويس جدًا، لكن لو لقيت إن رؤيتنا مختلفة بقول لنفسي المخرج هو صاحب العمل، وهو اللي يتحمل المسؤولية في النهاية". وتحدث سامح سليم عن مخاطر المهنة قائلاً: "التصوير مهنة خطرة، واتعرضت قبل كده لحادث أثناء تصوير فيلم تـيتو سيارة اصطدمت بسيارتنا وفي فيلم افريكانوا الاسود هي اللي سايبة واحنا اللي جوا اقفاص وللأسف في مصر مفيش تأمين لا على السينما ولا على المعدات، احنا ربنا اللي بيسترها معانا". وعن تجربته القصيرة مع التمثيل، أوضح سليم: "جت لي فرصة تمثيل في فيلم عمارة يعقوبيان بدور ضابط، لكن بصراحة أنا معنديش موهبة التمثيل، والمخرج الراحل علي عبد الخالق كان ساعات يديني دور صغير كده ويقولي: ادخل جرب، لكن عمري ما فكرت أكمل في الاتجاه ده". مهرجان الاسكندرية بدورته الـ 41 تشهد دورة هذا العام مشاركة واسعة من حيث عدد الأفلام والدول المشاركة التي تصل إلى 46 دولة، حيث يعرض 131 فيلمًا ضمن 8 مسابقات، منها 7 مسابقات للأفلام ومسابقة للسيناريو. وتأتي هذه الدورة من مهرجان الإسكندرية السينمائى استمرارًا لدوره في الاحتفاء برموز السينما في مصر ودول البحر المتوسط، وتعزيز أواصر التبادل الثقافي والفني بين شعوب المنطقة، ويقام المهرجان هذا العام تحت رعاية وزير الثقافة الدكتور أحمد فؤاد هنو، والفريق أحمد خالد حسن محافظ الإسكندرية.
