متابعة بتجــرد: حلّت الفنانة هالة صدقي ضيفةً على برنامج “كلام نواعم” الذي يُعرض على قناة mbc، حيث تحدثت بصراحة عن نظرتها للعلاقات الإنسانية، ومكانة الرجل في حياتها، كاشفةً أنها لم تعد ترى أهمية لوجود الرجل ما لم يكن داعماً وإيجابياً في حياتها.
وقالت هالة صدقي خلال اللقاء: “ولا ليه لازمة لو هو إيجابي وناجح معايا في حياتي أهلاً وسهلاً، لو هو سلبي وبيأذيني مع ألف سلامة، ودي مسألة حظوظ، الحكاية إنتي وحظك، ممكن يبقى في راجل عظيم وأول ما يلاقيكي بتنجحي وبتنوري بتلاقي الشخصية اتغيرت”.
وأضافت أنها باتت تفضّل العزلة في حياتها الشخصية، موضحةً: “مؤخراً بقى عندي عزلة، مش حابة الناس أوي ومش عايزة أتعرف على حد جديد، أنا عندي كام صاحبة حلوين الحمد لله ومش عايزة أكتر من دول، اكتفيت لأن مخزون التسامح اللي عندي خلص، فعشان مخسرش ناس تانية ومتضايقش”.
هالة صدقي: إلهام شاهين الأقرب إليّ
وعن أقرب أصدقائها في الوسط الفني، قالت هالة صدقي إن الفنانة إلهام شاهين هي الأقرب إليها، قائلةً: “هي اللي ببقى صريحة معاها من غير رتوش، وبتستحملني، وكمان ليلى علوي ويسرا”.
كما كشفت عن رأيها في الصداقة بين المرأة والرجل، معتبرةً أنها صداقة مفيدة في كثير من الأحيان، مضيفةً: “عندي أصدقاء رجالة قريبين جداً مني وشايفة إن صداقة الرجل إلى حد كبير بتبقى مفيدة”.
هالة صدقي: محمد سامي مخرج موهوب وأعشقه فنياً وشخصياً
تحدثت هالة صدقي أيضاً عن تعاونها مع المخرج محمد سامي، معبّرةً عن إعجابها الكبير بموهبته، حيث قالت: “محمد سامي كان بالنسبة لي هدف، كنت لما بشوف أفلام يوسف شاهين أقول أنا شبه الكاركتر بتاعته، وكنت نفسي أشتغل معاه. محمد سامي نفس الحكاية، أنا متابعاه بدقة وقلت نفسي أشتغل معاه، مع إنه كان جاري وبيطلع وينزل معايا في الأسانسير ومكنتش عارفة إنه هو محمد سامي”.
وأضافت: “هو بني آدم موهوب جدًا، ولما بيلاقي حد مصحصح ومركز معاه بيطلع السما وبيخدك معاه، وأنا بعشقه على المستوى الشخصي والفني لأنه بيحب شغله ومتمكن منه وكل حواسه فيه”.
اختلافات الفن بين الماضي والحاضر
وفي مقارنة بين بدايتها الفنية في الثمانينيات والوضع الحالي، قالت هالة صدقي: “في الثمانينيات كنا بنحب شغلنا وكان في تدقيق، بنعمل بروفات ترابيزة وبنعرف مين النجوم اللي معانا، دلوقتي بندخل المسلسل أو الفيلم وأنا معرفش مين البطل اللي قدامي ولا عملت معاه بروفة. زمان كان الكاتب ليه أسلوبه في الحوار، دلوقتي الورش خلت الأسلوب يضيع، وأنا مش بفضلها لأنها حاجة جديدة مفيهاش إبداع”.
ملحوظة: مضمون هذا الخبر تم كتابته بواسطة Bitajarod ولا يعبر عن وجهة نظر مصر اليوم وانما تم نقله بمحتواه كما هو من Bitajarod ونحن غير مسئولين عن محتوى الخبر والعهدة علي المصدر السابق ذكرة.
