أكد عبد الظاهر السقا، نجم منتخب مصر السابق، أن حسام حسن مدرب المنتخب لازم ياخد حقه حال وصوله بمنتخب مصر إلى كأس العالم في إنجاز لم يتحقق منذ عام 90 مع الراحل الجوهرى، حيث يعتبر ثاني مدرب مصري يتأهل بالفراعنة للمونديال.

وقال عبد الظاهر السقا خلال حواره في برنامج تأشيرة المونديال المذاع على قناة أون سبورت: ليه رابطين سعادتنا بالمنافس، لو كان معانا السنغال أو كوت ديفوار أو المغرب كانت السعادة أعلى بكتير، لكن ضعف المنافس مخلى السعادة قليلة مش عارف ليه، طيب مش احنا اللى عملنا القرعة  ولازم نفرح حال وصولنا غدا الي كاس العالم وكابتن حسام حسن لازم ياخد حقه.

وأضاف: حسام حسن سيعتبر أول مدرب مصري يصعد بمنتخب مصر إلى كأس العالم من بعد محمود الجوهرى حال فوز المنتخب غدا علي جيبوتي، وعظمة حسن شحاتة اللى صعب الأمور على  اللى بعده بالتتويج بثلاثة ألقاب أفريقية، بكرة لازم حسام حسن ياخد حقه بهذا الإنجاز.

وتابع: محمود الجوهرى كان ليه بصمة واضحة على كل اللاعبين اللى لعبوا معاه لأنه كان بيشوف اللى محدش شايفه، والكابتن حسام حسن واخد منه الروح والقوة وبيعرف يوصلها للاعبين.

وأوضح: أي منتخب في العالم بيمر بمشاكل لأنك بتكون في أعلى مكانة في الكرة المصرية، فلازم يواجه مشاكل وانتقادات ويتغلب عليها، وحتى الآن في التصفيات لم نواجه منتخب قوى يظهر عيوبك اللى تشتغل عليها ولكن هو ناجح حتى الآن في التصفيات.

وأضاف: حسام حسن واجه مشكلة كبيرة في إصابة محمد عبد المنعم لذلك لجأ إلى محمد ربيعة في بعض الأوقات رغم قصر قامته، ثم توجه إلى خالد صبحى لأنهما يلعبان بالقدم اليسرى، فاختيارته هو مقتنع بيها وبيحارب عليها لحل هذه الأزمة، وزى ما شوفنا المباراة الماضية أنه يلعب مروان عطية بعد غياب 3 أشهر والكل كان متخوف من ذلك ولكن هو لعبه بشكل أساسى ونجح في ذلك.