علق الإعلامي أحمد شوبير حارس مرمى الأهلي ومنتخب مصر السابق على قرار اتحاد الكرة باختيار المدير الفني لمنتخب مصر الأولمبي الجديد، بعد الاخفاق الكبير لأسامة نبيه مع منتخب الشباب في كأس العالم بتشيلي.

كان مجلس إدارة اتحاد الكرة قد كلف اللجنة الفنية لاتحاد الكرة وعلاء نبيل المدير الفني للاتحاد باختيار مدرب منتخب مصر الأولمبي الجديد من المدربين الوطنيين في مصر المؤهلين لقيادة المنتخب في الفترة المقبلة.

وقال أحمد شوبير تعليقا على القرار: «خلونا نكون أمناء شوية، ما هي العلاقة بين الكابتن علاء نبيل واللجنة الفنية؟ أيه صلاحيات كل منهما..؟ هل هو بيرشح ليهم ولا هما بيرشحوا له..؟، وكيف يتم الاختيار للمدرب وجهازه المعاون..؟، وهل الخطة عمل كوادر شابة جديدة من المدربين أم كيف سيتم الاختيار؟».

وتابع شوبير تساؤلاته موضحًا: «وهل لما يختاروا المدرب الجديد، اتحاد الكرة والمهندس هاني أبوريدة ريدة مش هيكون لهم رأى..؟، يعني باختصار من الذي سيختار في النهاية ويأخذ القرار؟».

وأوضح شوبير: «أنا عندي مدير فني لاتحاد الكرة يبقى أمنحه صلاحياته كاملة، وهل الجهاز الفني مثلا اللي مع كابتن حلمي طولان في منتخب مصر الثاني اللجنة الفنية هي اللي اختارته، ولا كان فيه ناس قالوا ده صاحبنا وده حبيبنا ومش عارف أيه..؟!، أنا بقول لك أهو بوضوح شديد لو فيه حد مش كويس مشيه ولو فيه حد بره كويس وقصرت في حقه هاته».

وأضاف شوبير: «اعملوا كده يا جماعة عشان ننجح الفترة اللي جاية، وفكروا في مدربين جداد، ما هو احنا كده كده بنخسر، فكروا في ولاد صغيرين يقدروا يعملوا حاجة كويسة والله نقدر صدقوني لازم ده اللي يحصل الفترة اللي جاية تعبنا وزهقنا من تكرار الأسماء».

واختتم شوبير: «موضوع خدنا المدرب ده من الأهلي يبقى المدرب اللي جاي من الزمالك سياسة قديمة، عايزين نشتغل صح بقه كفاية، الناس هتفضل تقول لك شوف المغرب اه شوف وفي الاخر اختار صح».