كتب على الكشوطى

قال أحمد أبو زهرة، نجل الفنان عبد الرحمن أبو زهرة، والد أميرة ومريم أبو زهرة المشاركتان فى حفل افتتاح المتحف المصرى الكبير، عبر حسابه بموقع فيس بوك: مش عارف ليه فيه ناس بتحب تفسد فرحة المصريين بأى شيء كويس، حفل افتتاح المتحف كان حدث عظيم وكبير ومش محتاج حتى دفاع عنه، لأنه نتائجه واضحة فى السياحة.

وأضاف أحمد أبو زهرة: على فكرة حفلة افتتاح المتحف هدفها كان افتتاح المتحف مش عمل موسيقى أو فنى للتاريخ، وبالتالى الغرض تم تحقيقه تماما وتم افتتاح المتحف.

عبد الرحمن أبو زهرة مع حفيدتيه أميرة ومريم

وأضاف أحمد أبو زهرة: بعدين تلاقى ناس بتكتب أصل اللى شاركوا فيهم العبر وكمان مش بيعرفوا يتكلموا عربى، على فكرة بقى أميرة ومريم بيتكلموا عربى، ومن يوم ما اتولدوا وأنا بكلمهم عربى ولكن عايشين فى أوروبا، لأن أوروبا فيها أحسن تعليم موسيقى وده لا يعيبهم فى شيء، ولكن هما مش بيمارسوا اللغة طول الوقت وبالتالى بيكونوا مترددين إنهم يقولوا حاجة غلط.

بوست أحمد أبو زهرة

وأكمل أحمد أبو زهرة: وبما إنهم بيحبوا يكونوا دايما متمكنين من أى شيء بيعملوه فبيفضلوا فى أى مواقف إعلامية إنهم يلجأوا للغة هما متمكنين منها.

وأضاف: وأنا دايما حريص إنى أربطهم ببلد أبوهم وجدهم، ودعوتهم للعزف فى هذا الحدث التاريخى كانت بمثابة أقوى رابط لهم بحضارتهم وتاريخهم وتواصلهم مع جدهم الذى أفنى عمره لرفعة الفن المصرى على مدار أكثر من ستين عاما.