قال مطرب المهرجانات عمر كمال، رُحت لدكتور نفسي ولا أخجل من الذهاب له وبتكلم معاه في كل الحاجات اللي مضيقاني، بما في ذلك مشاكلي مع أصحابي بالوسط الفنى، وحياتي الشخصية”.
زيارة عمر كمال للطبيب النفسي
وأضاف خلال لقائه ببرنامج “حد النجوم” المذاع على القناة الأولى: “كل فترة لازم أزور الطبيب النفسي وأفضي كل اللي جوايا، السنة اللي فاتت مكنتش كويس ولا في أحسن حالاتي لكن السنة دي أفضل”.
ولفت عمر كمال: “أنا مكنتش متزن نفسيا وقت علاقتي بـ ندى الكامل طليقة الفنان أحمد الفيشاوي وهي لما سمعت الكلام ده كان لها رد فعل غاضب طبعا”.
قصة لحن أغنية بنت الجيران
في سياق آخر أوضح: “الشاب اللي عمل التيمة بتاعت أغنية بنت الجيران أكيد كان عارف إنها بتاعت محمد حماقي، وحسن شاكوش مكنش يعرف إنها لحن اغنية حماقي لما اتبعتت له”.
موقف محمد حماقي
ولفت: “محمد حماقي لما أغنية بنت الجيران نزلت، كان رد فعله محترم ومتكلمش خالص، واحنا اعتذرنا له وخلصنا الموضوع، بس الأغنية كانت سبب شهرتي أكتر من حسن شاكوش”.
عمر كمال يتحدث لأول مرة عن تعليمه
وأكد: “اتعلمت لحد الثانوية، وانا مش غاوي تعليم ومكنش في دماغي ادخل الجامعة ومكنتش من الشطار وكل اللي كان يهمني إني أشتغل علطول، وبحب اشتغل بإيدي مش بدماغي، حاولت اروح معهد الموسيقى العربية بس رفضوني علشان معايا دبلوم مش ثانوي”.
وتابع: “الشهادة حاجة كويسة بس بالنسبة لي مرحلة مقفش عندها، والحلو اللي أخدته منها إني بعرف أقرأ وأكتب، وميعبنيش المؤهل بتاعي، والراجل ميعبهوش لا شهادة ولا جيبه ولكن يعيبه ميكونش ابن ناس ومش بتاع ربنا وإنسان جاحد وبخيل”.
