محمود أبو زيد منقذ التمانينات_ اليافت

اللى قدم رسايل لخمسين سنة قدام بس للاسف محدش عمل حساب للى جاى
اتكلم عن المخدرات عن التجار والكيف عن الاخلاق وانحطاط البشر عن الدجل عن الجشع وعدم الرضا
صاحب الخماسية التاريخية
الكيف _ العار _ الذل _ البيضة والحجر _ جري الوحوش

الكاتب لازم يكون مرآة الحياة حواليه ينتقدها ويحاول يصلح فيها قدر المستطاع وعشان يعمل ده لازم ينتقى كل جملة بيكتبها وده اللى عمله محمود أبو زيد ونقول ٣ مشاهد بس

” خوف الناس من المستقبل بيسبب لهم قلق
والقلق بيزود استعدادهم لتقبل الإيحاء وفي ظل الإيحاء الناس ممكن تصدق أي حاجة”
البيضة والحجر
” العيب مش في إرادة السوء وبس… العيب في سوء الإرادة” فيلم الكيف
” ويل للعالم إذا انحرف المتعلمون وتبهيظ المثقفون” البيضة والحجر

فيلسوف يا جدعان…. فيلسوف
حتى فلسفة الإنحطاط بردو حاضر
” لازم ندوش الدوشة بدوشة أدوش من دوشتها عشان ما تدوشناش”
” أنا سيكوباتي وانت سرينجاتي”
” افتح الودع وأقرطس الجدع وأعمل حجاب مستور…. لو شافه القمر ما يدور”

نشوف بقى الأسماء اللى انتقاها
الكيف :
مزاجانجى _ بيصى _ محروس ننس _ البهظ بيه _ عبده الكرف _ ستموني _ زيلو _ عين الشكروط _ بونوق

العار:
الدفاس _ أبو دقشوم _ طلبة _ بصبوص العترة _ المعلم أتوت _ هنوف _ تئليسي _ فسواني

البيضة والحجر :
مستطاع الطعزي _ سباخ التيبي _ تاروطه _ كئوده _ جاسر صفوان _ صباسي _ توالي سنيح

راجل عالمي اقسم بالله تحسه متربي بالنهار في بالكونات الكوربة ونوادى مصر الجديدة والليل في حواري الزاوية الحمرا وإمبابة

ولو هنتكلم عن اسماء فيلم الذل يبقى محتاجين قاموس عربي فارسي تركي عشان نفهم الاسماء ومعانيها

“إنما الأمم الأخلاق ما بقيت فإن هم ذهبت أخلاقهم….. ذهبوا”
وذهبنا وفضيناها

محمود أبو زيد ١٩٣٦ _ ٢٠١٦ تغمده الله بواسع رحمته