تحدث الفنان إسلام إبراهيم، عن سبب انسحابه من بطولة عمل درامي في موسم رمضان المقبل 2025، بجانب الحديث عن إمكانية تقديم جزء ثانٍ من مسلسل أعلى نسبة مشاهدة، ومشاركته في مسلسل تيتا زوزو بطولة إسعاد يونس.

وقال إسلام إبراهيم، في لقائه مع الإعلامية فاطمة مصطفى، على راديو 9090: كنت مترشح لـ بطولة مسلسل في رمضان 2025 والبطلة شافت أني مش أمور كفاية، وده حصل والله بجد وأنا انسحبت بهدوء.

وأضاف إسلام إبراهيم: يحيى الفخراني بابا الدراما كسر كل القواعد اللي اتعودنا عليها وعمل الرومانسي في نصف ربيع الآخر وكل ستات مصر كانوا متجننين عليه، رغم أنه معندوش مواصفات الجان اللي هي العضلات والطول وكان مليان.

أما عن مشاركته في مسلسل تيتا زوزو، فعلق إسلام إبراهيم: إسعاد يونس لها فضل عليا، وعملتلي حلقة مناصفة مع أحمد داود وأنا وقتها كنت وجه جديد، وأنا ممتن للست دي وفرحت لما عملت معاها مسلسل تيتا زوزو، وأنا من جوايا بقول أنا هقف قدام حد أنا بعشقه، وهي بتدوب الخوف ولديها بساطة العظماء، وهي عارفة أنها نجمة كبيرة وبتتعامل بتلقائية والشغل معاها كان حلم.

وعلق إسلام إبراهيم، على إمكانية تقديم جزء ثانٍ من مسلسل أعلى نسبة مشاهدة، قائلًا: ياسمين أحمد كامل، طلعت بفكرة مرعبة، لأن فعلا مصائب السوشيال ميديا كارثية والجزء الثاني من أعلى نسبة مشاهدة هيبقى قنبلة والشخصيات هتبقى في حتة تانية خالص، ولكن الموضوع نام ومش عارف هيتعمل ولا لأ.

إسلام إبراهيم: الستات يطلع منها ضحك كتير.. والناس بقت تقدر مجهود الفنان

كما تحدث إسلام إبراهيم، عن تقديمه شخصيات نسائية في عدد من الأعمال، قائلًا: أنا عندي مشكلة أني بتعامل مع الستات زي ما بتعامل مع الرجالة، الستات شخصيات كتير أوي ويطلع منهم ضحك مختلف، والحمد لله الناس عارفة أني ممثل وبعمل أي دور، وعلى حسب ما الدراما تطلب مني هعمل.

وأضاف: الناس وعيها بقى كبير وبتفهم وبقوا عايزين موضوع كويس وتمثيل كويس وبقوا يحكموا على الحاجة بجودتها، ومبسوط أن الناس بقت تفهم الممثل المجتهد من اللي مش مجتهد وبيقدروا التعب.

.