قصة الحب اللى بدأت بالمسقعة..

خلال فترة الدراسة بكلية الحقوق تصدى عادل خيري لتقديم مسرحية الريحاني “حسن ومرقص وكوهين”..

وقتها كان العرف إنه يتم الاستعانة بفنانات من الخارج لأن البنات اللى فى الداخل رافضة فكرة التمثيل.. وبما إنه متمرد بطبعه قرر عادل خيري أنه يقضى على الظاهرة دي.. فعرض فكرة المشاركة فى المسرحية على اكتر من طالبة وكلهم رفضوا ماعدا واحدة اسمها إيناس حقي.. هى اخر واحدة توقع أنها توافق..

اعجب عادل بالعقلية المتحررة اللى صادفها فى الكلية.. ولما وقف قدامها فى المشهد الأخير من المسرحية حس كل واحد منهم أنه بيمثل بحرارة غير عادية .. وكان الحوار بينهم بيدور على الطريقة التشبيهية.. بحيث أن البطل يشبه نفسه بطبق المسقعة ويطلب من البطلة فى عصبية الحب انها متحاولش تاكل المسقعة طالما بتكرهها.. لكن البطلة بتفاجئه وتعلن أنها بتحب المسقعة جدا “زيي كده”..

المهم .. خرج الاتنين من المسرحية بصداقة قائمة على الاحترام والتقدير .. وبمرور الوقت انضمت إيناس لشلة عادل وكانت شلة كبيرة.. وتبادل الاتنين المعلومات.. والكتب.. والمذكرات.. وتبادلا أيضا نوع من الإخلاص يندر بين الأصدقاء.. حتى لما النتيحة ظهرت الاتنين نجحوا بالتقدير نفسه..

بعد التخرج بدأت إيناس تتدرب على السباحة واعتلى عادل خشبة المسرح.. واتعلقت إيناس بالمسرح .. واتعلق عادل بالسباحة ..وكانت إيناس لازم قبل ما تروح بيتها تعدى على مسرح الريحاني.. وكان عادل مبيفوتش فرصة إلا ويكون جنب إيناس فى أى بطولة.. ومع كل اللى فات.. احترف الاتنين المحاماة وبقوا يتبادلوا القضايا .. وفضلت الصداقة بينهم تكبر يوم بعد يوم لحد ما جه اليوم اللى شايفين صورته ده..
#الحكواتي_الهامي_سمير
#الهامي_سمير