هاجم الإعلامي عمرو أديب، المدير الفني لمنتخب مصر الكابتن حسام حسن بعد التعادل المخيب للاَمال أمام غينيا بيساو ضمن التصفيات المؤهلة لنهائيات كأس العالم 2026.
معادلة خطيرة أمام منتخب مصر
وقال عمرو أديب خلال برنامج “الحكاية” المذاع على قناة “إم بي سي مصر”: “اللي يقولك احنا رجعنالك بنقطة من غينيا بيساو هو عنده حق رجعنا فعلا بنقطة ومنقوطين من منتخب مصر، غينيا بيساو فرقة ملهاش لا في التور ولا الطحين ولا هي عايزة تلعب ولا تبقى جزء من المعادلة وفجأة تدخل معاك المعادلة ويبقى ليها مكان وتأثير وبعدين ندخل في حسبة برمة”.
مشكلة اللاعبين مع منتخب مصر
وتابع: “اللاعيبة تعبانة جدا ومرهقة جدا والتغيرات مضطربة جدا، مفيش ماتش واحد إلا ويقال إن اللاعيبة مرهقة ومش قادرة معقولة يا جماعة هو هيجي ايه اسهل من كده ده احنا في أوكازيون لولا اللي ربنا يبارك فيه محمد صلاح فينجيك ويحييك ويخليك راجع شبه سعيد، هذا المنتخب لا شكل له لا خطة له ولا تقدير له، ناصر ماهر لو نزل عشر دقايق بدري كانت الدنيا اتغيرت”.
محمد صلاح ينقذ منتخب مصر من الخسارة
ولفت:”محمد صلاح هو صلاح الدين ينتصر علطول ويجيب الجون ويخلص لك علطول، لولاه اللي كنتوا قالبين عليه الدنيا كنت خسرت الماتش”.
غياب خطة وطريقة حسام حسن مع منتخب مصر
وواصل: “مدرب المنتخب بتاعنا لازم يعرف لاعيبته ومين بيلعب فين، هو فين الخطة اللي عنده، بس أعتقد إن لا فيه خطة ولا طريقة، اللاعيبة اللي بتطلع اللي عندها زي محمد صلاح وتريزيجيه وزيزو، اللاعيبة هي اللي بتلعب يا جماعة، احنا مش شايفين ملامح للمنتخب ولا شغل للمدرب”.
سهولة مجموعة مصر في تصفيات كأس العالم
واستطرد: “هل ده مستوى فريق جيد؟ انت في مجموعة الله يسهلك ودعوة الأمهات إنك تيجي في مجموعة سهلة إنما غير كده انت لم تفعل شئ ونحن مستمرين في الأمر بكفاءة صلاح وتريزيجيه، إنما كفرقة أو كيان لأ معندناش، وبالشكل ده مش هيبقى عندنا منتخب لا شكل ولا أداء”.
مشكلة حسام حسن خلال مباراة غينيا بيساو
وأردف: “لو مكنش المدرب يعرفه يعني ايه طعم الفوز هنفوز ازاي، ده بينزل لاعيبة تعطل الكرة تحت رجليها، انت متعرفش لاعيبتك يا كابتن حسام حسن ولا تعرف توظفهم ولا عارف تعمل شكل ولا خطة ولا طريقة، انت عايز توقف الدوري ولا تغليه علشان غينيا بيساو ولا إثيوبيا”.
شماعات التعادل أمام غينيا بيساو للدفاع عن حسام حسن
وأختتم: “مش عايزين مصنع الشماعات إياها صلاح رفض يطلع أو يتغير محصلش، إمام عاشور عنده مشكلة مع الجهاز الفني محصلش.. مفيش لاعب منور تحت قيادة المدرب، ومش شايفين أي شغل أو بصمة له، كان في ايدينا الموضوع يخلص قدام إثيوبيا وربنا يستر في اللي جاي”.
