وجه الفنان كريم الحسيني تساؤلًا لـ دار الإفتاء ورجال الدين والشيوخ، بعد منعه من دخول أحد المساجد في المقطم لأداء صلاة العصر، بسبب غلق المسجد أبوابه بعد أداء الفريضة وخروج المصلين.

ونشر “الحسيني” مقطع فيديو عبر حسابه الشخصي بموقع “انستجرام”، وتحدث، قائلًا: “أنا لما أبقى ماشي على طريق وأركن وأكون عاوز أصلي العصر والساعة دلوقتي مكملتش خمسة ونص، ولسه الناس بتخرج من المسجد، المسجد اسمه الشهيد أحمد حسن الجندي في المقطم، ولما أركن وأقول له عاوز أدخل أصلي العصر، يقول لي معلش إحنا قفلنا الجامع”.

وأضاف: “قلت له بتتكلم جد ولا بتهزر؟ قال لي بتكلم جد.. قلت له طيب أنا مش جايلك في صلاة المغرب أنا جاي لك في صلاة العصر، ولسه الناس ماشية، بقوله اللي عاوز يصلي يعمل إيه.. قال لي جملة في منتهى الكوميديا، قال لي يصلي في بيته”.

وتابع: “قلت لو أنا مش في البيت وركنت وعاوز أصلي يكون فين.. قال لي أنا عبد المأمور، يعني أطلع المصلية وأصلي هنا في الساحة موافق طيب؟ هل ممكن أدخل أتوضى؟ رفض وقالي أنا آسف،.. قلت له طيب أتيمم ولا أدخل اتوضى في كافيه”.

وتساءل: “هل إحنا وصلنا لهذه الدرجة؟، بتكلم بجد وسؤال لكل الناس هو احنا بنقفل الجوامع بعد الفريضة مباشرة؟، ده العصر مفتوح لغاية المغرب، هل ده يعقل؟.. ردوا عليا يا أهل الخير”.

جدير بالذكر أن آخر أعمال كريم الحسيني مسلسل “اللي مالوش كبير” بطولة ياسمين عبد العزيز وأحمد العوضي وخالد الصاوي وخالد سرحان ودينا فؤاد ودنيا عبد العزيز وفتوح أحمد وهدى الإتربي، ومن تأليف عمرو محمود ياسين ومن إخراج مصطفى فكري.